سفاح رهيد البردي
انا اتولدت في رهيد البردي واهلي هم قبيلة السلامات، كنا عايشين حياة عادية جدا كمواطنين بنشتغل في الزراعة والرعي، بنسعي البهائم وجزء مننا بتاجر في الأسواق وكانت حياتنا حياة طبيعية جداً. جينا معسكر السريف يوم 13 شهر 4 سنة 2013 وسبب وجودنا في المعسكر انو في مشاكل وقعت علينا من قبل قبيلة التعايشة زائد مجموعات من الحكومة استغلت سلطتها الموجودة في المحلية؛ ومن الناس الكانوا جزء من مشكلتنا وتهجيرنا القسري من رهيد البردي عبدالكريم موسى عبدالكريم اللي وقتها كان والي جنوب دارفور بالإنابة وكان رئيس لجنة أمن المحلية، وكذلك موسى مختار السميح معتمد محلية رهيد البردي وأعضاء لجنة أمن المحلية كلهم كانوا حضور؛ وكمان قائد الجيش وقائد الشرطة ومدير الأمن كانوا حضور في لحظة تهجيرنا واستغلوا برضو قائد الاحتياطي المركزي بالمحلية واللي كانت وقتها علي كوشيب، الزول ده هو الضربنا بشكل مباشر وحرك كل عرباتو واللي ضربت اهلي، وعمري ما حانسى المشاهد دي.

الاحداث دي حصلت بسبب انو كان في مجموعة من الأعيان وبحضور المعتمد اللي كان هو واحد من الاسباب في تهجيرنا. اها بعد تجمع المقاتلين اللي تم جلبهم من مناطق مختلفة ومعاهم عرباتهم، جو ناس بطريقة مشبوهة في محلية رهيد البردي قمنا اتكلمنا مع المعتمد وقلنا ليهو ياخي نحن شايفين مظاهر ما كويسة ومتخوفين على ممتلكاتنا في السوق، فقال لينا الان انتو بتقاتلكم دولة السودان وما بتقاتلكم قبيلة التعايشة والقبائل المعاها، الان انتو أثبتوا جليا أنكم معارضة وضد نظام الحكومة القائم، واللي هو كان نظام البشير؛ وبعد ما تم ضرب كل القرى والفرقان اللي كنا بنسكنها وتم نهب ممتلكاتنا ومن ضمنها سوق رهيد البردي وده كان السبب الرئيسي واللي تم بموجبو تهجيرنا من كل مناطقنا الاصلية الى نيالا قسراً فى عربات الاحتياط المركزي وعربات الجيش، وجابونا بيت الوالي وامانة الحكومة وبعدها من أمانة الحكومة ودونا مدرسة اسمها مدرسة الزهراء قعدنا فيها أيام طويلة، ولانو كان عددنا كبير جونا بعض الإخوان وبعض المنظمات ونقلونا إلى معسكر السريف.
الضرر السببتو الحرب دي كان كبير، خسائر فادحة في الأرواح يعني اكثر من الف وميتين اربعة وتسعين من المنتسبين لينا في قرانا ومن أسرتنا كلهم تم قتلهم وحرق جميع القرى والبيوت والممتلكات؛ وتم نهب كل الدكاكين وما خلوا لينا شئ، وفقدنا كل شئ ده غير التعذيب الاتعرضوا ليهو بعض الناس. تم كل ده بسبب إنتمائنا العرقي وبحجة انو نحن ما عندنا الحق في رهيد البردي ووافدين حسب زعمهم؛ ونحن في الواقع عندنا حقوق في المحلية زينا وزي باقي الناس، وللسبب ده تم توظيف القبيلة توظيف سياسي من قبلهم هم باعتبار انو القبيلة دي أصبح عندها كثافة سكانية وعندها إقتصاد في السوق كبير جداً؛ وبدأ برضو يكون عندها ناس ناشطين ومتعلمين، بس هم رفعوا فينا تقارير وقالوا القبيلة دي متمردة ضد الحكومة وبالتالي الحكومة برضوا استخدمت القبيلة ديك كآلية وضربتنا.
نحن عاوزين الناس الارتكبوا في حقنا الجرائم دي يتحاسبوا على كل العملوهو، بداية من لجنة أمن الولاية برئاسة عبدالكريم موسى عبدالكريم وكتها ولجنة أمن المحلية برئاسة موسي مختار السميح ومحاسبة على كوشيب قائد الاحتياطي المركزي اللي موجود حالياً في المحكمة الجنائية الدولية والطاقم الإداري لقبيلة التعايشة لانو هم ديل الارتكبوا كل الجرائم دي في حقنا. بعد محاسبة المجرمين ديل عاوزين نسترد كل حقوقنا الفقدناها من مواشي وتجارة؛ بس الاهم من ده كلو انو تتم إزالة القوة الاثنية المسيطرة حالياً، اي نعم كوشيب في المحكمة لكن القوة حقت اثنيتو مازالت موجودة ومهيمنة في رهيد البردي. نحن ممكن نرجع رهيد البردي تحقيق العدالة وبعد توفير الخدمات، بس وللاسف يعني مافي اي جهات اتواصلت معانا لحد هسي عشان نحن نحكي ليها قصص الفظائع الحصلت لينا دي؛ وحتى لو زول فينا مشى داير يفتح بلاغ في فترة من الفترات والبلاغ ده كان ضد معلوم بكتبوا ليك بلاغ ضد مجهولين، يعني بالواضح كده في جهات بتتسترعلى القضية دي؛ الحصل في حقنا ده تطهير عرقي وكل الناس الخسرت ارواحها وممتلكاتها وأمنها كل ذنبهم انهم كانوا في رهيد البردي بس.


