خُرده
في أبريل 2018م وبعد مخاطبة طلابية عن الراهن الطلابي في جامعة النيل الأزرق، طلعت من الجامعة معاي اتنين من أصحابي، بس أول ما وصلنا السور الجنوبي للجامعة لقينا تاتشر فيهو أشخاص لابسين لبس مدني، الناس ديل اوّل ما شافونا نزلوا منهم زي أربعة اشخاص وجو جاريين علينا، نحن عرفنا أنهم قوة من جهاز الأمن لأنو دي الطريقة الكانو بيعتقلوا بيها الطلاب الناشطين سياسياً، ونفس الطريقة الاعتقلوني بيها أكتر من مرة، حاولنا نهرب منهم وبقينا جاريين على اتجاه بوابة الجامعة، وفعلاً أصحابي المعاي قِدروا يدخلوا الجامعة بس أنا اتقبضت قبل أصل البوابة، واحد منهم ضربني في راسي بحاجة كان شايلها في يدو وفي اللحظة ديك ماقدرت أميّز هي الحاجة دي شنو، لأنو بديت افقد الوعي وبقيت شايف الحاجات حولي طشاش طشاش، آخر حاجة كنت بتذكرها قبل اصحى وألقى نفسي في المعتقل، كانت صوت واحد منهم وهو بيضرب فيني بكل قوته وأنا راقد على بطني في التاتشر وبيقول لي: “انت عامل فيها راسك كبير مش؟ الليلة راسك ده بنكسروا ليك” صحيت لقيت نفسي في المعتقل مرمي في الأرض على ضهري وفي حمّام مساحتو ما بتتجاوز متر في متر، بعدها جا واحد من أفراد الأمن وكان زول عاتي وواضح على ملامح وشو انو زول كتال كتلة وشراني، فتح باب الحمّام من برّة وجا داخل علي وأول حاجة عملها بعد ما دخل فتح الدش وبقت الموية تدفّق في جسمي وهو بيضرب فيني من غير مايقول ولا كلمة، استمر الضرب ده لفترة ماقدرت أحددها من الألم بس الأنا متأكد منو إنها ما كانت قصيرة، أنا كنت مرعوب وماكنت متخيّل انو ممكن أعيش تاني عشان احكي قصتي دي. بتاع الأمن ده مسكني من رجلي الشمال وطلّعني من الحمام وبقى جارّيني في الأرض، في اللحظة ديك أنا ما كنت قادر أبدي أي مقاومة وبحاول أصرّخ بس ماكنت بسمع صوتي لأنو جسمي كلو اتخدّر من الضرب وشبه كنت في غيبوبة، سحبني في ممر ضيّق شديد ولمن وصلنا نهاية الممر ده كان في باب، فتح الباب ده ورماني جوة الغرفة دي وطلع من غير مايقول ولا كلمه، حاولت أفتح عيوني أشوف أنا وين وفي منو معاي في الغرفة دي، اتفاجأ بواحد من أساتذتي في الجامعة قاعد في الكرسي ورا الطربيزة و بيحاول يحقق معاي.

بعد أسبوع تقريباً أنا طلعت من المعتقل، المرة دي طلعت سريع بس ما طلعت زي ما دخلت، لأنو عيني الشمال باظت بسبب التعذيب الاتعرضت ليهو، وبعدها اتفصلت من الجامعة معاي حداشر نفر تانيين، كل الناس البعرفهم كانوا بيقولوا لي حاول أطلع من السودان لأنو الناس ديل ماحيسيبوك في حالك بس أنا كنت مُصر أواصل طريقي، لأنو ماكان همي أكل وأشرب واتعالج بس، ولو كان ده همي كان سمعت كلام أهلي لمن كانوا بيضغطوا علي وبيقولوا لي: “سيب الأمور الفارغة البتعمل فيها دي وتعال اسرح لينا بالبهايم حقتنا، وأعمل ليك قريشات تعرّس بيها وتبني حياتك، عشان قرايتك وسياستك المباريها دي مابتنفعك“. أنا رغم الضغوط الكتيرة دي من أهلي ومن ناس الأمن كنت مقتنع انو لازم أكمل طريقي حتى لو فقدت عيني زاتو، لازم أوصل للتغيير الأنا كنت مؤمن بيهو، وما اتراجع وانهزم قدام كل الناس الكانوا بيراهنوا على فشلي. كملت طريقي لانو ده خيار أنا اخترتو ومفروض اتحمل نتيجة إختياري لحدي النهاية. بعد اتفصلت من الجامعة واصلت نشاطي السياسي في الشارع، وكنّا بنعمل مخاطبات في الأسواق وأندية الأحياء معاي زي حداشر من الشابات والشباب، والحاجة دي استمرت لحدي ما حالتي الصحيّة ساءت وقررت أسافر مصر عشان اتعالج والكلام ده كان قبل تقوم ثورة ديسمبر بفترة قصيرة، وفعلاً مشيت مصر وبديت العلاج بس طبعاً كنت محتاج ألقى لي شغل أقدر أواصل بيهو العلاج لأنو غالي وماف زول بيقدر يتكفّل لي بمبالغ قدر دي، خصوصاً أنو أهلي كانوا شايفين انو أنا لو كان سمعت كلامهم ما كان حصل الحصل لي ده، قضّيت في مصر فترة صعبة جداً وكنت حاسي بالهزيمة لأنو آخر حاجة كنت ممكن أفكر فيها هي إني أسيب السودان وأمشي أقعد أعاين للوضع الكعب البيعيشوهو السودانيين والسودانيات من برّه، أي أنا وضعي ما أحسن منهم بس برضو أنا ما قاعد أعيش معاهم نفس المعاناة، وبرضو حاسي انو كلّ تعبي التعبته في السنوات الفاتت و معاي باقي الشباب راح ساي. فجأة طلعت مظاهرة في النيل الأزرق عملوها طلاب الثانوي، وبعدها الشرارة وصلت مايرنو في سنار والطالبات والطلاب طلعوا الشارع وقالوا: “حكومة الجوع تسقط بس، حكومة العسكر تسقط بس، تسقط، تسقط بس“، ولما الشرارة وصلت عطبرة وحرقت دار المؤتمر الوطني والناس قالوا تسقط بس، أنا برضو قلت تسقط بس. وقتها في ديسمبر 2018م أنا كنت لسة ما كمّلت العلاج بس ماقدرت أقعد، وكنت ما عاوز يفوتني شرف المشاركة في التغيير ده، عشان كده ركبت وجيت راجع السودان في الوقت الفيهو ناس كتار كانوا بيحاولو يطلعوا من السودان، نزلت الشوارع مع الناس، أهتف هتافاتهم وأرجّع معاهم البمبان للعساكر، مع انو خلاص فقدت عيني للأبد بس كنت حاسي إني ياداب رجع لي شوفي، كنت بشوف بعيون الشابات والشباب المعاي في المواكب، وكنت بتقوّى بيهم وبيهن، والمرّة دي ما كنت خايف من الاعتقال ولا حتى كنت خايف اني أموت عشان التغيير كان حتمي المرة دي، وإصرار الشابات والشباب ديل ما خلّا جوّاي أي ذرة من الشك تجاه نجاح الثورة المرّة دي، وده الحصل فعلياً.
أنا شاب من مجموعة اثنية تنتمي للقبائل البيطلقوا عليها قبائل “عربية”، أهلي ناس ماعندهم علاقة بالسياسة ولا ناس بيفكروا في الحكم والحاجات دي، ناس رعاة كل همهم في الحياة دي انو يزيدوا عدد بهايمهم وأولادهم، ويعملوا ثروة من ورا تجارة المواشي، وده كان واحد من أسباب الخلاف بيني وبينهم، لأنو أنا زول طموح وبحب اتعلم وأعبر عن رأيي وشايف انو أنا ما بنتمي لقبيلتي بس، انما أنا السودان ده كلو بنتمي ليهو ومشاكل أي زول في السودان ده هي مشاكلي، وكمان مؤمن بانو أي ظلم ارتكبته حكومة الكيزان تجاه أي زول و زوله هو ظلم وقع علي أنا شخصياً، وبسبب قناعاتي دي أهلي قاطعوني واتهموني باني زول “خايب ساي” لانو في عرفهم أي شاب ما بيعمل ثروة من البهايم ويتزوج في سن صغيرة ويجيب عيال كتار ده زول باطل ساي، حتى لو عمل دكتوراة عديل نظرتهم ليهو ما حتتغيّر، خلّيك من انو يكون ناشط سياسي أو ناشط في مجال العمل المدني. بس بالنسبة لي الشي الصادم ما كان مقاطعة أهلي لي، ولا الأذى الإتعرّضت ليهو بسبب معارضتي لحكومة الكيزان، الشي الصادم هو كان تعامل الناس المسكوا مناصب في حكومة الثورة، والبحاولوا يستبعدوني من أي مشاركة بحجّة انو أنا خلفيتي الإثنية تابعة للقبائل العربية، وانو القبائل العربية دي هي خاينة وماف زول منها من حقو يشارك في أي شي في البلد دي بعد الثورة، بغض النظر عن إنو الزول ده منو، وشنو هي التضحيات القدمها هو والغيرو عشان نصل للمرحلة الفيها البلد هسي دي، يعني الشعور بالمرارة الأنا حسيته بسبب السلوك ده ماحسيته لمن عرفت اني فقدت عيني وما حاشوف بيها تاني، شعور بالأسف والشفقة على حال البلد، ولو أي زول بيصحى الصباح يلقى نفسو خاين، وممنوع من انو يشارك ويقول رايو؛ يبقى وين التغيير النحن كنا بنتكلم عنه وبنحاول لينا سنين اننا نخلقو! والعشانو واجهنا أهلنا وناس الأمن، وإدارات الجامعات، والإعلام بتاع الحكومة، وكل الحاجات الكعبة دي، عشان نقول حاجة واحدة بس، وهي انو السودان ده ما حق زول ولا حكومة، السودان ده حقنا كلنا.


