الكونيغر
كان في قرية في جبال النوبة اسمها شرورو، والقرية دي واقعة في وسط الجبال الشرقية البتسكنها قبائل الميري، الطبيعة هناك سمحة شديد والأرض خضراء والجو خريفي أغلب فترات السنة، بس الوصول للقرية دي ما كان ساهل لأنو الجبال محاوطاها من كل الاتجاهات. ناس القرية دي ناس مسالمين جداً وعمرهم ما اتعدّوا على حق زول، وبسبب موقع القرية والتضاريس المحيطة بيها ما حاولوا يطلعوا منها وفضلوا قاعدين جوه حدود قريتهم دي بس، يزرعوا الأرض لما المطر يصب، ويرعوا البهايم لما الأرض تخدِر. ما كانوا قايلين انو في عالم تاني ورا الجبال دي لأن الأرض ادتهم كل شي وما حوّجتهم لي زول، وفضلوا يتوارثوا الحاجة دي جيل بعد جيل. كان مع كل نهاية جيل الكجور بيختار زول من الجيل الجديد عشان يبقى هو الكجوري بتاع القرية، والكجور هو الروح البتحمي القرية من الشر وكمان هو البجيب الخير، وماف زول كان بيخاف من اي شي طول ما الكجور موجود، ولو حصل أي شي كان الكجور بيلم الناس وبيتكلم معاهم بي لغتهم البفهموها وهي لغة افريقية قديمة، وما كان بينزل بنفسو من الجبل عشان يكلمهم لكن بيرسل ليهم (كونو كودي) وده الوسيط الروحي بتاع الكجور. عشان كده لمن الكجور يجي يختار زول ما بيختار أي زول… ولازم الزول البيختارو يكون زول بمواصفات خاصة، ويمر بامتحانات صعبة ومراحل بيتدرج فيها لحدي ما يتلبّسه الكجور..
في سنة من السنين المطر اتأخر وناس القرية كانوا خايفين الخريف مايجي ومخزونهم من الأكل يكمل، عشان كدة حاولوا يتواصلوا مع الكجور أكتر من مرة بس كان بيرفض يتكلم معاهم وبيرسل كونو كودي عشان يرجعهم وما يطلعوا ليو في رأس الجبل، لأكثر من شهرين كل مرة كان بيرجّعهم، والحالة ضاقت شديد والنسوان بقى ماعندهم لبن عشان يرضّعوا شفّعهم، ودقيق مافي عشان الناس تاكل، والبهايم بدت تموت لأنو مافي قش في الأرض، ناس القرية بدوا يفقدوا الأمل في نزول المطر وفي ناس بدت تشكك في مقدرات الكجور. وفي اليوم داك واحد من شباب القرية اسمه كودي وكان من أقوى مصارعين القبيلة و عنده سمعة واسعة، لمّ ناس القرية في ميدان المصارعة قبل الواطة تضلّم وقال ليهم: نحن رجينا الكجور الزمن ده كلّو والمطر ما جا، ولمن مشينا ليو بدل المرة مية مرة طردنا وأبى يتكلم معانا، وياهو زي ما انتو شايفين بهايمنا ماتت، والأمهات شطورهن بقت ما فيها لبن من الجوع، دايرين تقعدوا لمتين تنتظروا الكجور؟، لحدي ما عيالنا يموتوا برضوا!
تعالوا نشيل عيالنا وبهايمنا ونمشي ورا الجبال دي، ونلقى لينا مكان فيهو مطر نزرعوا، ولو انتو ما ماشين أنا بمشي براي واقعدوا انتو انتظروا الكجور يجيب ليكم المطر. بعدها أي زول رجع بيته وهو بيفكّر في الكلام ده بس ماعارف يعمل شنو؟!. في نفس اليوم بالليل والواطا كانت مضلّمه شديد ناس القرية سمعوا صوت كونو كودي من فوق الجبل، كان بينادي فيهم وبيقول في أسبار الكجور، ناس القرية عرفوا انو في اشارة، وقاموا كلهم طلعوا الجبل عشان يسمعوا كلام الكجور. الكجور قال ليهم:
يا عيال شرورو!
يا عيال ميري!
وعيال التسعة وتسعين جبل!
المطر اتأخر عشان أنا خلاص مفروض أسلّم الكجوريّة لروح من أرواح ميري النقية، و شرورو حيجيها خير كتير عشان كدة بكرة لازم تضبحوأ 13( كيكو) وترفعوا لي دم الضبيحة فوق راس الجبل، وتعملو كمبلا تلاتة يوم.
يا عيال شرورو!
يا عيال ميري!
وعيال التسعة وتسعين جبل!
عندكم جنى مرق منكم، خالف وصايا الكجور وخان وصية الاجداد، عشان كدة حيجيكم بعد مطر الخير ده، مطر فيهو شر كبير وفيهو نيران حتنزل من السماء، شر ما حتقدروا عليهو وده حيكون في (الكونيغر).
في اليوم التاني من نبؤة الكجور، بدت الطقوس واستمرت تلاتة يوم. النسوان صدورهم عريانه وبيرقصو الكمبلا ضبحو 13 كيكو، وأغاني الأسبار ما وقفت ولا لحظة، الدبايب طلعت من الكراكير، والشفع الصغار رفعوهم في رؤوس القطاطي. في اليوم الرابع المطر صبّ والموية جات نازلة من راس جبل الكجور مخلوطه بالدم، طلعوا كل ناس القرية واحتفلوا بنهاية الجفاف، كانوا بيردّدوا أغاني الكجور وبيمجٌدوا في الكجور الكبير، بس بقدر ما كانوا فرحانين، كان الخوف ظاهر في عيونهم لانو نبوءة الكجور حقت الشر ما حتقع الواطا ومصيرها تحصل. الأرض ِروت وقام العيش والبهايم شبعت وجا عيد الحصاد (الكونيغر). في اليوم داك (كونو كودي) لمّ الناس كلهم عشان الكجور داير يسمي الكجوري الجديد، ناس القرية اتلموا وشالوا عيالهم وطلعوا جبل الكجور، كونو كودي كان واقف في مدخل (الكركور) والكجور متلبسه وقال ليهم:

“انا لميتكم الليلة عشان اختار الروح الحتمسك الكجورية من بعدي، عشان كدة ارفعوا لي (امّا) لانو هي حتكون الكجورية بتاعتكم وهي الحتحميكم وتحافظ على ارض اجدادكم، وتوريكم متين تزرعوا ومتين تحصدوا، ولازم تحترموا كلامها عشان نحن الكجور في التسعة وتسعين جبل اخترناها تكون الكجورية بتاعتكم.”
(امّا) كانت من أذكى بنات القبيلة وشجاعة وقوية لدرجة إنها الزولة الوحيدة الغلبت كودي في المصارعة، (امّا) ما كانت بتتكلم كتير وناس القرية كانو عارفين انو الكجور حيختارها عشان كل العلامات ظهرت فيها، فكانوا بيحترموها وبيقدّسوها. بدت طقوس تنصيب (امّا) والناس كانت بتغني أغاني الأسبار وبترقص الكمبلا، وعيد الحصاد بقى عيدين بتنصيب كجورية جديدة
للقرية.
في اللحظات ديك حصلت الحاجة الكانوا خايفين منها كل ناس القرية، اتحققت نبؤة الكجور الكبير وجو ناس شايلين اسلحة غريبة، ناس مابيشبهوا اهل شرورو، ولابيتكلموا لغتهم، كانوا بيكبٌروا بهستيريا، وضربوا اي زول بالرصاص، وضبحوا الشفع الصغار، واغتصبوا النسوان والبنات، كانوا كل مايقتلوا زول بيقولوا: الله اكبر سبعة مرات. ناس القرية الماضربتو رصاصة جرى واتدسا في كركور، كانوا مخلوعين وبيصرخوا وبيستنجدوا في الكجور. اتكتلوا من ناس القرية عدد كبير شديد، واتحرقت الزراعة حقتهم وساقوا بهايمهم قدام عيونهم. الناس الهاجموا القرية ديل كانوا بيتكلموا لغة غريبة اسمها (عربي)، واهل شرورو اول مرة يعرفوا انو في لغة زي دي اساساً، وكان مع الناس ديل كودي اللي كان لابس زيهم ويتكلم عربي زيهم، كودي طلع الجبل بسلاحو ودخل كركور الكجوري الكبير، لمن جا طالع كان فرحان شديد وبيكبر يصوت عالي وبيقول: الله اكبر، الله اكبر. وبقى يفتش على (اما) عشان يكتلها برضو وهو ماعارف انها بقت الكجورية بتاعة القرية، (اما) اختفت وماف زول قدر يعرف مكانها، والقرية اتحرقت كلها. بعد الحصل ده بقية الناس الشردوا من الموت لقوا نفسهم في حته في الخرطوم اسمها (زقلونا)، وكانوا بيقولوا ليهم يانازحين، هم ماكانوا مستوعبين الحاصل شنو، ولا عارفين يتكلموا مع الناس اللقوهوم في الخرطوم ديل كيف، بس كل القدروا يعرفوهوا، انو حكومة الخرطوم اعلنت ضدهم الجهاد، ورسلت ليهم الجيش معاهو ناس من القبايل التانية عشان يدخلوهم الاسلام ويخلوهم يتكلموا عربي، بس الجيش ده منو؟، كانوا بيسألوا كل يوم:
مش ياهو الناس الجو كتلونا وضبحوا عيالنا قدام عيونا؟
مش ياهم الناس الحرقوا لينا بيوتنا وزراعتنا؟
مش ياهم الناس الخلو كودي يكتل الكجوري الكبير، ويكبر فوق راسو المجدوع في بطن الكركور؟
في الوقت الكانوا فيهو باقي ناس القرية النازحين بيسألوا فيهو عن حياتهم الاتسلبت منهم، كانت (اما) جوة كركور في رأس جبل الكجور في القرية، بتعمل في طقوس سبر المطر لي ارض خرابة، ومليانة بالجثث وبراميل المتفجرات الفاضية.



ما النهاية الكنت متوقعها ؟ لعن الله الحركة الإسلامية والجيش على الجرائم اللي عملوها 💔💔
جميل