بت أمها

اتربّيت في بيت سوداني بسيط، أهلي نزحوا من منطقتهم الإتولدوا فيها بسبب الحرب وبعدها جو استقروا في الدمازين، المدينة الإتولدنا فيها أنا وكل أخواني الأصغر مني، وبحكم انو أنا كبيرة البيت وماف ولد أكبر مني رباني أبوي، و كان دايماً بيحاول انو يخليني أكون جزء من المجتمع النحن عايشين فيه، ألبس لبسهم، وآكل أكلهم، واتكلم بطريقتهم، أنا ما عارفة هل أبوي كان بيحاول يحميني زي ما كان بيقول؛ انو ما عايزني أسمع كلمة شينة من الناس عشان أنا مختلفة عنهم، ولا أبوي ده كان بيحاول انو يبعدني من الصراع النفسي الهو عاشوا أول ما نزح من قريته للدمازين!. حكت لي أمي انو لمن جو جاريين من قريتهم للمدينة بسبب انو الحرب ما خلت ليهم لا بيت لا بهايم لا أهل، لقو أقرب مكان ممكن يمشوا ليهو هو كان مدينة الدمازين وال-هي مدينة لمّت أغلب الناس الإتأثروا بالحرب، وفيها اثنيات مختلفة وثقافات متعددة، بس امي وابوي في فترتهم الأولى لقو تعامل سيء جداً من المجتمع، وكانوا الناس بيضحكوا عليهم بسبب شكل لبسهم الكان بيمثل عاداتهم وتقاليدهم الجو بيها من منطقتهم، أو بسبب لغتهم الكانوا الناس بيسخروا منها وبيعتبروها ما عربي واضح، وابوي تعب شديد عشان يقدر يتأقلم مع المجتمع ده ويتعايش معاهو، وما قدر يشتغل ويشتري لينا بيت نسكن فيه إلا بعد ما بقى يتكلم زي ناس المدينة ويلبس لبسهم، ويشاركهم في مناسباتهم، وقصاد كل الحاجات دي ابوي اضطر انو يتخلّى عن تراث أجداده وعادات وتقاليد أهله. بتذكّر مرة لمن كنت في المدرسة الثانوية كان عندنا يوم ثقافي، قمت جيت لأمي قلت ليها عاوزاك تلبّسيني لبس اهلنا الكانوا بيلبسوهو في البلد عشان عاوزة اشارك بيهو في اليوم الثقافي بتاع المدرسة، قامت امي فرحت بالحاجة دي ولبّستني تراث اهلنا، بس لمن ابوي شافني اتضايق شديد وضربني وشاكل امي قدامي قال ليها: “كيف تلبّسيها لبسة زي دي انتي دايرة الناس يقولوا علينا متخلفين، ولا ماعرفوا يربوا بتهم، ولا يقولوا علينا شنو؟“.

أنا دايماً كنت بحاول أفتش على تراث أهلنا الفي البلد، وبحاول أكون مختلفة لانو ما كنت حاسة انو نحن بنشبة المجتمع العشنا فيهو ده، وانو امي وابوي عايشين في حالة غربة نفسية بتظهر كل وقت والتاني لمن يسمعوا أغاني التراث حقت اهلنا في الرادي، أو لمّن يحكوا قصص مغامراتهم لمن كانوا يادابهم شباب في البلد قبل تحصل الحرب ويتشرّدوا. الحاجة الكانت محيّراني وكنت دايماً بسأل عنها امي، انو لي المجتمع ده ما عاوز يتقبّل اننا ناس مختلفين عنو وما بنشبهو وعندنا تفاصيلنا الخاصة بينا، ولي دايماً بيحاول يجبرنا اننا نمشي معاهو في خياراتو الهو بيختارها لينا! بس لمن كبرت ودخلت الجامعة بدت توضح لي إجابة السؤال ده شوية شوية. بتذكّر في مرة من المرات كان عندنا قضية طلابية في الجامعة وأنا كنت جزء من تنظيم طلاب الحركة الشعبية جناح الحلو، وطبعاً في 2011م الحكومة حظرت الحركة الشعبية من ممارسة العمل السياسي بي حجة انها حركة مسلحة وبتهدّد أمن الدولة، وأي زول بيقول أنا حركة شعبية كان بيتم اعتقاله ومضايقته ده لو ماتمت تصفيته، عشان كده انا ما كنت معلنة عضويتي في الحركة وكنت شغالة تحت مسميات مختلفة عشان اقدر أحمي الشباب المعاي وأحمي نفسي وناس بيتنا، في اليوم داك عملنا اجتماع مع عميد الكلية عشان نرفع ليهو مطالبنا، ولانو أنا تم تفويضي من قبل الأجسام الطلابية المختلفة داخل الجامعة انو أوصّل المطالب دي لعميد الكلية، رفعت يدي في الاجتماع عشان اتكلم، قام العميد رفض يديني فرصة اتكلم، وقال للحرس طلعوا البت دي بره الجامعة لأنها ما طالبة معانا هنا، وهو كان بيعرفني حق المعرفة لأنو بيدرّسني في الكلية، بس لأنو زول عنصري وكان بيكره أي زول جاي من جبال النوبة أو عندو علاقة بجبال النوبة. 

قبل ما اتخرج من الجامعة حصلت جريمة لواحد من الطلاب الكانوا معانا في الجامعة جريمة هزت كل أركان الحركة الطلابية وقتها، بسبب مظاهرة طلابية تم قتل طالب اسمه علي ابكر وهو من أبناء دارفور، وتم قتلو بطريقة ما فيها اي ذرة انسانية، في اليوم داك انا كنت حاتكتل برضو لو ما ربنا ستر، كان يوم كعب لدرجة اني ما قادرة اشيلو من ذاكرتي لحدي هسي.

من مقتل الطالب علي أبكر موسى في يوم 14 مارس 2014
 

أهلي لما عرفوا اني انضميت للحركة الشعبية قوّموا الدنيا وقعّدوها، خصوصاً امي الكانت بتقول لي: “كيف تباري ناس زي ديل؟ ناس بيقولو عليهم ما مسلمين، وبناتهم شراميط، وبيسكروا، وبيعملوا السبعة وزمّتها“، أنا كنت بحاول أدافع عن نفسي بس امي وابوي كانوا شايفين انو ما ممكن المجتمع كلو والحكومة يكونوا غلط وانا صح، حتى بتذكر مرة أبوي حاول يضربني بسبب انو واحد من معرصين الكيزان الفي الحي جا قال ليهو بتك دي مبارية أولاد الحركة الشعبية في الجامعة، أنا ما لُمت ابوي على الموقف ده لانو حسيت قدر شنو الغربة النفسية العايشها مؤثرة على تفكيره، وقدر شنو هو بيتعرّض لضغوط اجتماعية و ابتزازات بحجة الشرف والاخلاق، عشان يتم اعتباره جزء من المجتمع ده، وما يتم وصفه بانو نازح ساي أو زول باطل، لو رفض انو يستجيب لابتزازهم ده. فضلت في الصراع ده مع ناس بيتنا وناس الحي تقريباً اغلب فترتي القضّيتها كطالبة في الجامعة، وبعد محاولات فاشلة كتيرة شديد قدرت في 2010م اقنع امي وابوي انهم يمشوا يحضروا معاي ندوة سياسية للحركة الشعبية، الوقت داك الانتخابات قربت وكان في نوعاً ما مساحة بتاعة حريات ودي الفترة السبقت انفصال جنوب السودان، امي وابوي كانوا مترددين بس انا اتلايقت فيهم وأصرّيت انهم لازم يمشوا معاي، لمن وصلت الندوة قعدتهم قدام، وأول مفاجأة بالنسبة ليهم انو بدينا الندوة بآيات من القرآن وتلاوة من الإنجيل، الحاجة دي كانت صادمة شديد بالنسبة لأمي وابوي وكان واضح فيهم إنهم مصدومين لأنو طوال السنين دي كلّها كانوا بيسمعوا في خطابات الحكومة انو “الحشرة الشعبية” دايرة تبقي أولادكم كفار، والمفاجأة التانية بالنسبة ليهم انو أنا كنت ضابط المنصة، وكانت أول مرة بالنسبة ليهم يشوفوا بتهم ماسكه المايك وبتتكلم قدام العدد الكبير ده من الناس وكمان بتهتف والناس ديل كلهم بيهتفوا وراها، حسّيت بانهم ماقادرين يستوعبوا الإحساس الهم حاسّنوا في اللحظة ديك، ما بين احساس بالفخر وبين خوف من كلام الناس وبين إحساس بالذنب وتأنيب الضمير وكأنهم بيقولوا لنفسهم: “لي نحن من زمان ماجينا سمعنا بتنا بتقول في شنو؟” بعد الندوة خلّصت أمي جات علي وحضنتني وبقت تبكي وتقول لي: “أعفي لي يابتي أنا كنت ظالماك، أعفي لي يابتي“.

 

.

 

 

الضريبة الدفعتها بسبب خياراتي في الحياة كانت كبيرة شديد، بس الضريبة الدفعتها بسبب اني بت و مختلفة عن المجتمع الأنا عايشة فيهو كانت أكبر بكتير. لمن كان بيتم اعتقالي في الوقفات الإحتجاجية، بعد الضرب والألفاظ الكعبة البسمعها أول سؤال كان بيتسئل لي “مش إنتي من جبال النوبة؟ طيب علاقتك شنو بالحركة الشعبية؟” ده كلو كوم وتعامل الناس معاي كان كوم تاني، أي انا ما وقفت محاولاتي لأني أحقق أحلامي وأثبت للحولي انو الاختلاف ده عمره ما كان سبب لانك تحتقرني أو ترفضني، أو تتحرش بي ولا تعتقلني، وما بطّلت أحاول أفهم ناس بيتنا والحولي أنو ما عشان أنا بت و انضميت لحزب سياسي أو لعبت كورة أو مارست أي حق من حقوقي كإنسان، أبقى أنا مطلوقة، أو قليلة أدب..

 

لو في حاجة واحدة هسي انا قادرة افهمها هي كمية التشوهات الخلقها المجتمع ده فينا والبسببها لحدي هسي ابوي لا عارف يتصالح مع الماضي بتاعه كزول جاي من منطقة الحرب دمرتها وشوهت ثقافتها وتراثها، ولا قادر يكون زول من المدينة العاش فيها النص التاني من حياتو، وبين اللتنين ديل نحن بنحاول نكون نحن.

 

Leave a Comment

Your email address will not be published. Required fields are marked *

Scroll to Top