حفلة التعذيب
بعد نزلوني المعاش من الخدمة في قوات الشعب المسلحة، اتزوجت واشتغلت في الهيئة القومية للكهرباء، قبل يتم خصخصتها في سنة 1996م، ونتحول من موظفين لحاجة سموها “مرابطين”، والكارثة الكبيرة جات في 2001م لما قاموا فصلونا من غير اي اسباب ومن غير حتى ما يدونا خطاب فصل. بعد داك اتعينت مراسل في المحكمة بس المرتب كان ضعيف وده خلاني اقدم استقالتي، في سنة 2005م مع اتفاقية نيفاشا للسلام قررت اسيب مدينة الدمازين وارجع قريتي “ود الماحي” وامشي استقر هناك. واخترت اني انضم لحزب الحركة الشعبية لانو حسيت انو بمثلني، وانو ممكن اقدر اخدم من خلاله أهلي في قرية ود الماحي، ابوي كان شيخ البلد لما جات انتخابات 2010م، وانا كنت مسؤول من فرز أصوات الناس الصوتو في الانتخابات، يعني كنت زي مراقب كده، وللأسف كل الدوائر فاز بيها حزب المؤتمر الوطني وده لانو زور واتلاعب بالنتائج.
يوم الخميس 29 رمضان، سنة 2011م ولعت نار الحرب في النيل الأزرق، بين الحكومة وجيش الحركة الشعبية، في اليوم ده تم اعتقالنا من داخل قرية ود الماحي وكنا نحن 22 شخص من قواعد الحركة الشعبية، يعني ما كنا عساكر وشايلين سلاح، كنا سياسيين وناس مدنيين ساي، الاعتقلونا كانوا ناس لابسين لبس الجيش، بس بعد كده عرفنا انهم ناس الدفاع الشعبي، الناس ديل اشتغلوا فينا تعذيب نفسي لمدة 15 يوم، وكانوا بيسوقوني من المعتقل ويودوني البيت يدخلو ويفتشوا بشكل عشوائي ويرهبوا بناتي، ومرات بيجيبوا لينا ناس في المعتقل وعلى جسمهم آثار تعذيب، بعدها 15يوم أطلقوا سراحنا.
رجعت لبناتي الخمسة وزوجتي، وعشان ماف زول بيصرف عليهم غيري لقيت حالتهم صعبة مادياً بسبب الأيام القضيتها في المعتقل، طوالي نزلت شغلي واللهو كان “توتوك” كنت شغال بيهو مواصلات بين قرية ود الماحي ومنطقة “بلقوه”، بعد أربعة أيام من طلوعي من المعتقل شلت لي مشوار فيهو، مراة كانت حامل ومعاها طفلين، ورجل كبير في السن وصلتهم منطقة “بلقوه” يعني زي مسافة 13 كيلو كدا من ود الماحي، بعد وصلتهم لقيت زميلي كان وصل مشوار لنفس المنطقة وجينا راجعين مع بعض زي الساعة الرابعة عصر، حوالي الساعة 11 مساءً جاء فرد من الاستخبارات العسكرية اعتقلني من البيت، والمرة دي ودوني قيادة الجيش في ودالماحي.
ربطوا يديني من قدام بالكلبشات ودخلوني في كرفانه فيها جاز وبنزين، ودخل علي ضابط برتبة نقيب ومعاهو ثلاثة عساكر، بيضربوا فيني اكتر من ربع ساعة وانا واقع في الارض وايديني مربوطه، ضرب عشوائي، مرة بآلة حادة ماعرفتها دي شنو، ومرة يشلتوني، كل الضرب ده وما اتكلموا معاي ولا استجوبوني، وبعدها شالوني رموني في كرفانه تانية وملابسي مشرطه وجسمي بينزف دم من حتات كتيرة. حوالي الساعة 5 صباحاً رحلوني من قيادة الجيش ودوني معسكر الدفاع الشعبي، من غير لا اكل ولا شراب، وجسمي مخدر من شدة الضرب، لمن وصلت معسكر الدفاع الشعبي لقيت قدامي 6 أشخاص، حالتهم كانت حرجة شديد، تم تعذيبهم لدرجة انك ما بتقدر تشوف ملامح وشهم كويس، ومن غير ملابس تقريباً ملابسهم كلها اتشرطت من التعذيب، وجسمهم كلو بينزف دم، انا كنت قايل حالتي صعبه، بس لمن شفت الناس ديل، لقيت حالتي احسن منهم. الحراسة كانت معروشة بزنك تعبان شديد ولو كشحت كوز مويه من فوق ممكن تجيك الموية داخلة بي جوة، والجو مسخن، والمكان ضيق شديد، قعدنا في الوضع ده 8 ايام وبعدها جات تعليمات قالوا من القيادة العليا انو يتم ترحيلنا الدمازين، رفعونا كلنا في مقطورة بتاعة بابور وكنا زي كم وعشرين نفر، قائد الطوف المسؤول من انو يوصلنا قيادة الجيش في الدمازين كان برتبة “حضرة صول” وكان معاهو ناس تابعين للدفاع الشعبي، بعد طلعنا من ودالماحي وصلنا مكان فيهو خور كبير بين الدمازين وود الماحي، عساكر الدفاع الشعبي ديل بقوا يكبروا بصوت عالي، نحن ما كنا فاهمين ده شنو البيحصل ده، لحدي ما جاني حضرة الصول ده وشايل في يدو بامبي، خت لي منو كم قطعة في خشمي، وهمس لي في اضاني، انو الناس ديل جاتهم تعليمات من قيادتهم انو “يصفوكم” في الشارع، وانا جاتني تعليمات من الضابط المسؤول مني في القيادة انو اوصلكم سالمين، عشان كده لو حصلت اي حركة غريبة اصرخوا بصوت عالي عشان اسمعكم واجي احميكم. حضرة الصول ده هو الزول الوحيد الحسيت انو عاوز يساعدني من اللحظة التم فيها اعتقالي، والزول الوحيد الحسيت انو ما عندو تجاهي أي ضغينة. لمن وصلت قيادة الجيش في الدمازين صدري كان اتورم بسبب القيد الكنت مربوط بيهو لفترة طويلة، وبسبب التعذيب والأذى الفي جسمي، في زول اسمو يحيى من ضباط الجيش لقيتو منتظرني واول ما شافني قال لي: ده انت الزول المجنن ود الماحي؟
قلت ليو: اي انا الزول المجنن ود الماحي.
نزلوني وبدوا يستجوبوني، ودي كانت اول مرة يتم فيها استجوابي من لحظة اعتقالي، بعد خلص الاستجواب دخلوني حراسة ما بتتجاوز مساحتها 12 متر مربع فيها حوالي 95 شخص، وكانت ضيقة لدرجة انك بتقعد ويجي زول يقعد في رجلينك، لما تتعب بتتبادلوا الأدوار، يقوم الشخص التاني عشان انت تقعد في رجلينو. لما الساعة 9 مساءً جات جوا عساكر نادوني بالاسم من دون بقية المعتقلين، وقالوا لي: تشرب شنو؟
انا كزول اشتغلت في القوات المسلحة عارف كويس السؤال ده معناهو، داير تتعذب باي طريقة؟، رديت ليهم اني ما عايز اشرب اي حاجة. ودوني مساحة فاضية ورا الحراسة، كانوا زي 8 اشخاص، دخلو راسي بين الكرسي وكل تلاته قعدو في اتجاه عشان الكرسي ما يتحرك، والاتنين التانيين شغالين فيني ضرب، كل 15 دقيقة بيوقفوا الضرب ويرفعوا يدي يشوفوني حي ولا ميت، لو يدي ما جات واقعه معناها انا لسه فيني روح، بيواصلوا فيني تعذيب. كان عندهم شوالات جاهزة في المعسكر، اول ما تموت من التعذيب طوالي بدخلوا جثتك في شوال وبيرموها في البحر، ناس كتار كانوا معتقلين معانا تمت تصفيتهم بالشكل ده، واهلهم لحدي اللحظة دي ما عارفين مكانهم وين، منهم 22 شخص كانوا معانا في الحراسات، بناكل سوا وبنتونس مرات، ومرات كتيرة لمن اجي راجع من حفلة التعذيب بنضفوا لي الجروح الفي جسمي عشان ما تلتهب، الناس ديل جو العساكر في يوم من الايام بالليل طلعوهم من الحراسة وساقوهم تحت جبل الرمة، وده جبل قريب من المعسكر كان، وقفوهم صف وضربوهم رصاص، اعدموهم من غير محاكمة، ومن غير حتى يسلموا جثثهم لاهلهم، بعد ضربوهم رصاص شالوهم ودمهم لسه سايل، حشروهم في شوالات ودفنوهم في حفرة كبيرة، وردموا من فوق ليهم التراب. من اليوم داك نحن كلنا الفضلنا جوة الحراسة اي زول فينا قنع من حياتو، كنا متوقعين انو في اي لحظة نلقى نفس مصير الناس ديل، انا ما كنت خايف من الموت بقدر ما كنت خايف على مصير زوجتي وبناتي الخمسة، كنت خايف ما اشوفهم تاني ولا اقدر احميهم لو في زول قرر يأذيهم.

قضيت 16 يوم ضقت فيها انواع مختلفة وقاسية من العذاب، جربوا يصفوني بطرق كتيرة بس الموت ما كان عاوزني، مرة حاولوا يقطعوا “عرقوبي” بالسونكي، ومرة تانية طعنوني بآلة حادة في صدري، وصلت مرحلة بقيت بشعر بأول 7 دقائق بس من التعذيب وبعد كده ما بشعر بأي شي، دموعي جفت واي شي حولي بقيت ما بشعر بيهو، يوم جابوا لينا 14 طفل من منطقة “دندرو” وبقوا يعذبوا فيهم بشكل خلانا كلنا الكنا قاعدين جوه الحراسة ما قادرين نتحمل، ده اليوم الوحيد الحسيت انو انا محتاج لدموعي الفقدتها، حاولت ابكي واقول ليهم: ديل اطفال صغار ياخ لي تعذبوهم كده؟، بس ما قدرت، صرخت للضابط المسؤول من تعذيب الاطفال ديل، قلت ليهو:
ياخ حرام عليكم وقفوا التعذيب ديل في النهاية أطفال صغار، لا شالوا سلاح لا قتلوا زول.
رد لي الضابط باستهتار:
وكمان عامل فيها انساني؟، يازول خليك في حالك ولو فتحت خشمك ده تاني، الليلة الساعة 9 لما تجي المعسكر ده ما بشيلنا.
في نفس اليوم استدعاني ضابط برتبة نقيب وسألني، هل عندك اخوك ضابط في الاستخبارات؟
قلت ليهو: اي عندي اخوي الاصغر مني.
قال لي: طيب لي ما جا يطلعك من المعتقل؟
قلت ليهو: يا سعادتك هو انا من يوم اعتقلوني ماف زول عارف لي اتجاه، وحتى لو عرف مكاني وجاء يسوقني، هتطلعوا “طابور”.
قال لي: اديني اسمو بالكامل و الوحدة التابع ليها.
اديتو اسم اخوي، وبعد أقل من ساعة اخوي جا داخل علينا في المعتقل، اول لحظات دخولو ما عرفني، ملامحي كلها اتغيرت من التعذيب، وهدومي كانت مشرطه وحالتها كعبة شديد، بعد دقائق الضابط قال ليهو الزول ده ماعرفتو؟، ده ما اخوك الكبير. في اللحظة ديك انا قعدت ابكي، بكيت لدرجة انو اخوي ما قدر يتمالك نفسه وطلع بره المكتب، بكيت بكى زول وقف قدام المراية وما عرف نفسة، زول خسر اي شي الا روحو وعزة نفسه، الضابط قال لي اخوي الصغير: سوق اخوك ده وديهو البيت، وما تخليهو يقعد في ود الماحي لانو ما معروف ممكن يحصل ليهو شنو تاني.



مؤثرة جدا ، الموت خارج اطار القانون اصبحت سمة ثابتة للقوات الدفاع الشعبي المشرفين على تعذيب الناس ،
القتل و التعذيب ، والمعاملة اللانسانية والمهينة للانسان يتم عبر قوات مسلحة تتدعي حماية الشعب ، وتستغل الضباط سلطتهم ونفوذهم في ايذاء المواطنين ، وترهيب السياسين بعيدا عن اعين القانون ، القتل وتخلص من الجثث عبر رميهم في البحر ، او دفنهم في اماكن مجهولة كضباط 28رمضان،. والاختفاء القسري للاشخاص ،كل الاعراف منع التعذيب ، والمعاملة غير الإنسانية اوالمهينة ،